<又上嚟髮牢騷>
牢騷一/
個年都唔知點,就過完喇~
利是唔駛講,最慘係全世界都未返工,我已經開工大吉.
一開工就做做做...做做做...做做做...
好艱難捱過8日,
終於可以放一日假,
起身已經中午12點幾,冇咗半日~
都唔知做咗咩就又要返工.
牢騷二/
上星期大出血.
1.做人情.
最怕呢啲場面,煩抽.結婚咪結婚囉,潦隻龜啫,搞咁多嘢好好反咩?唉,我聽咗個幾月,聽都聽到煩啊~
大住個肚重咁多要求,結就結,唔結就罷!唔知邊個緊啲呢?
唔知呢個人係傻定係有心計.我實在好難理解佢嘅行爲.
呢家人真係想賣女,點解農村啲人咁野蠻?
我承認我有偏見.好多農村嘅諗法我係好睇唔過眼.
至少到現時爲止,冇邊個農村人嘅價值觀、舉止我係覺得欣賞嘅.
我當然想佢好,但係...我並唔睇好佢哋.
可能從此呢個世界多咗一個老婆奴,
對女方嚟講當然係好事,
但喺我嘅立場,
我不願見其成.
祝你好運!!!生性喇~
2.冇啦啦去食餐晏,食完走去睇眼鏡,就大出血.
雖然我個鏡框已經用咗1.2.3.4.5...11年,
不過我對佢都冇反感.
難得有樣消耗品我對咁耐都冇睇佢唔順眼,
(手機,幾年前我已經睇佢唔順眼.雖然以爲佢要壽終正寢嘅時候傷心、自責咗一個月)
不過佢又真係殘咗啲嘅,鏡片又花又脫膜,好好地一個眼鏡畀我摧殘到噉....
都應該畀佢光榮退役嘅.
牢騷三/
過咗咁多日,終於可以去補返隻牙.
陰功啊,隻牙畀我搞到得返個殼不但只,重已經有裂紋.
做著我隻牙你都黑仔囉.
我曾經試過食完晏刷牙,但係晏晝個口會好唔舒服,
唔識形容,就好似朝早起身嗰種FU.好難頂~
我都係時候要認真對待呢個問題喇.
留言列表